Kacrita wenten ida sang pandita, sane mapesengan Bhagawan Domya, Pasraman idane ring jagat Ayodya. Ida madruwe sisya tigang diri sane mapesengan, Sang Utamanyu, Sang Arunika miwah Sang Weda.
Makatatiga tureksain ida, napi ke murid-murid idane suyakti bhakti ring guru. Tata caran ida rikala nureksain, Sang Arunika kapandikayang makarya ring carike, sadurunge ida Sang Guru micayang kaweruhan indik kadharman. Dawning asapunika wacanan Ida Dang Guru, Sang Arunika ngemargiang sapari polah makarya ring sawah.
Sang Arunika nandur pantun ring carike, risampun lanus entik pantune, rauh sabeh bales pisan sane kadulurin blabar ageng, embid puindukan carike. Antuk ajerih idane pantune kalancah antuk toyane ageng, empelin ida toyane punika, during suwe empelane punika malih embid, malih empel ida malih embid. Duaning asapunika kawentenannyane rumase bingung Ida Sang Arunika tan uning sane patut kalaksanayang.
Selanturnyane anggan idane kaanggen ngempel, raris ida nyeempang ring toyane. Nyantos rahina wengi. Paindikan punika kaaksi Sang Arunika antuk Bhagawan Domya, raris ngandika ; Cening Sang Arunika matangi idewa dahating pageh cening ngelaksanayang bawos bapane nyantos idewa ngempel toyane antuk ragan ceninge. Jani bapa ngemaang cening adan. Sang Udalaka, sawireh cening ngempelang ragang ceninge ring yehe.
Malarapan bhaktin ceninge ring guru, cening lakar mangguhang kasukan sekala sidhi mantra, sandi ngucap. Sane mangkin Sang Utamanyu sane tureksain ida, kapangandikayang ngangonang lembu, raris Ida Sang Utamanyu nganggon. Sajeroning Ida nganggonang lembu raris ida kaluwen punika mawinang ida ngagendong utawi idih-idih, utamipun ngidih ajengan angen ida pangupajiwa rikala ida ngagon. Sakewanten pikolih idane nenten katurang ring Ida Dang Guru, indike punika kawikanin oleih Bhagawan Domya. Raris Ida Bhagawan Domya mawacana, cening Sang Utamanyu ngaturang sembah kadulurin nunas pangampura, duaning pamargin idane iwang.
Benjang semengane, memargi ida ngangon, sambilang ida ngidih-idih. Pikolih punika aturang ida ring guru, sesampune katurang, malih ida ngidih-idih. Kaaksi olih Ida Dang Guru, mingkalihin ida ngidih-idih, raris tan kalugra, dening kabawos lobha. Malih ida ngangon saantukan kaluwene raris ida nayub susu sareng godele ring nyonyan lembune. Katakaning olih Ida Dang Guru napi sane kanggen sangu rikala ngangon.
Matur Sang Utamanyu, titiang masusu ring nyonyan lembune. Ngandika Ida Dang Guru ; cening Sang Uatamanyu sing patut laksanan ceninge buka keto, sawireh nyuwang druwen nabe ento adane, awinan ida wusan nginum susu.
Wenten didih medal saking bungut godele punika dilat ida pinaka sangun ida ngangon. Malih katakenin olih Nabe, ih cening Sang Utamanyu tusing patut ento ajengan cening, pianak lembune nawang cening seduk, malarapan baan kawelasaannyane teken cening, ipun ngutahang pikolihnyane manyonyo. Tusing dadi cening nyuwangin amerthan ia I godel, makelo-kelo bisa berag godele.
Sapunika wacanan Ida Dang Guru, Sang Utamanyu ngaturang sembah tur nunas pengampura. Benjang pasemengan malih ida ngangon, nenten ngajengan. Antuk kaluwen idane, raris ida ngajengan getah daun madori, punika panes pisan., nyusup rawuh ring panyingakan Ida Sang Utamanyu mawastu Ida buta, paling Ida ngeruruh lembune, wenten semer pat irika ida runtuh macelempung. Sesampune sore mawali lembune kekandang nyane nenten wenten ngatehang. Duaning nenten kacingak Sang Utamanyu nguningayang raga buta lantaran ngajengang getah madori. Kapriangenan pisan Ida Peranda Guru ngaksi sisyan ida ngemasin buta sangkaning dahat bhaktin ring sang meraga guru. Raris kaicen ida Sang Utamanyu mantra Aswinodewa, pinaka tamba samangdane wusan ida buta, malih mewali panyingakan idane parai purna, sakadi mula nenten wenten cacadnyane. Sangkaning ketelebang sang Utamanyu dados sisya, ida polih panugrahan kawisesan, kaweruhan olih Ida Bhagawan Domnya.
Selantur ipun ida Sang Weda sane katureksain. Sang Weda kanikain mangda jenek ring pawaregan, ngaturang rayunan Ida Dang Guru nyabran rahina. Melarapan antuk bhaktin Ida Sang Weda ring Dang Guru kadulurin panes tis sarahina pakaryan ida nyodayang rayunan majeng ring Ida Dang Guru turmaning setata ngiring sakancan pituduh sang meraga guru. Raris ida kaicen panugrahan makudang-kudang pangeweruh miwah Weda Mantra.
Risampune Sang Weda molihang panugrahan raris ida mantuk ka patapan idane. Ida uning pisan mangkin ring pakewuhe ngamolihang kaweruhan utawi kawikanan mawinan ida makayun-kayun ring angga. Sapunika daging pakayun ida, yan idewek ngelah sisya, buin maniyan lakar jeg bang iya Sang Hyang Mantra, lakar sing idihin sasari sane patut katur ring sang maraga guru, turmaning lakar tusing tureksain, sekadi Ida Bhagawan Domya nureksain deweke. Mungguing asapunika pakayun Ida Sang Weda.
0 comments:
Post a Comment